Un privilexiado entorno, tranquilo e inspirador, con vistas á baía e con todas as comodidades do centro histórico coruñés ao alcance da man.
Iniciativa privada dunha poeta individual, a Residencia Literaria 1863 establece acordos con entidades públicas e privadas destinadas á promoción da escrita creativa en xeral ou da literatura dos seus países en concreto.
Estas, patrocinan as estadías de habitualmente un mes no noso retiro para escritores/as da cidade da Coruña.
Sen que a dirección da nosa residencia literaria participe nos mesmos, créanse comités de avaliación con persoas de recoñecido prestixio no mundo das letras. Estas dirimen e seleccionan o proxecto merecedor da oportunidade en residencia.
Ademais do aloxamento (con auga, luz, wifi, electrodomésticos, servizo de limpeza e recollida no aeroporto), as bolsas adoitan incluír o desprazamento ata A Coruña e dietas para gastos básicos (manutención) durante o mes de residencia.
Próxima a un dos mellores e máis xenuínos mercados de abastos da cidade, os beneficiarios/as poden cociñar na propia cociña da residencia, ou visitar os moitos restaurantes ou bares de tapas que a circundan.
Ademais, establecemos pequenas alianzas con institucións, entidades e proxectos presentes na nosa cidade para que acollan os nosos residentes dalgún xeito un tanto especial. Por iso son adoito convidados/as ao teatro, concertos, museos, presentacións de libros, charlas ou recitais.
Se así o desexan, divulgamos en redes sociais a presenza e obra dos nosos residentes, aos e ás que realizamos unha pequena sesión fotográfica. Aínda que están concibidas para estadías individuais a soas e con plena autonomía, sempre hai alguén na cidade ao eventual dispor do ou da residente. A Coruña é unha cidade moi segura, confortable, de abranguible escala, vivaz e amigable.
Os e as escritores/as residentes contan coa oportunidade de celebrar unha presentación da súa obra no contexto dunha libraría, club de lectura ou biblioteca da cidade. Isto súmase a encontros –se cadra máis informais– con escritores/as, editoriais, artistas e outros produtores culturais de Galicia e España.
Patrocinada polo Concello da Coruña
(Periodicidade: anual. Inicio: 2021)
Patrocinada pola Secretaría Xeral de Cultura da Xunta de Galicia
(Periodicidade: anual. Inicio: 2021)
Patrocinada pola Dirección Xeral de Política Llingüística do Principáu d’Asturies
(Periodicidade: anual. Inicio: 2021)
Patrocinada pola Editorial especializada Col&Col
(Periodicidade: anual. Inicio: 2022)
Patrocinada polo Concello da Coruña
(Periodicidade: anual. Inicio: 2022
Patrocinado pola Secretaría Xeral de Cultura da Xunta de Galicia
(Periodicidade: anual. Inicio: 2022)
Concienciada en favor da Literatura Galega actual, do seu nivel de diversidade e excelencia literaria, da súa ambición creativa, do seu potencial e da súa capacidade de internacionalización, a nosa entidade é á vez consciente das escasas vías públicas ou privadas capaces de impulsala no estranxeiro.
Grazas a elas, narradores, dramaturgas e poetas de Galicia teñen profundado na súa obra de creación dende centros situados en países como Islandia, Palestina, Turquía, Croacia, Irlanda, Polonia ou outras zonas de España (como Andalucía).
Todos eles e elas gozaron de tempadas nas que dedicarse por enteiro á súa faceta creativa mentres aumentaban os seus perfís internacionais e ampliaban os horizontes de referencia cultural e vital.
Tras a revisión do perfil e traballo do ou da aspirante, extendemos convites oficiais á nosa residencia e apoiamos deste xeito a procura de fondos que o respalden, encamiñada por parte do interesado ante institucións do seu país.
Finalmente, as MICRO-RESIDENCIAS consisten en programas nos que –ademais do que de por sí pon a Residencia Literaria 1863– as autoras e autores costean do seu capital privado boa parte das estadías, a fin de evitar esperas e procesos competitivos. Simplemente reservan as datas e acuden para refuxiarse a escribir.
Aínda que o noso calendario está maioritariamente ocupado coas bolsas en colaboración con entidades, ocasionalmente abrimos datas para este tipo de oportunidades de residencias autofinanciadas, que adoitan durar unha ou dúas semanas.
